من بغى الفرقا لقــى له عذر وأسباب ودليل
خل عنك العذر والأسباب دام الحب ضاع
كان ودك بالفراق .. أبشر عسى عمرك طويل
لاتردد وأنت لك كلمة .. ولك أمرٍ مطـــاع
لي عليك إنك تــبــت بكلمةٍ تشفي الغليل
ولك علي إني لأوقف وقفة الرجل الشجاع
لاتجاملني مخافة (( قال )) مدري خوف (( قيل ))
عمر هرج الناس مايسمن ولايغني جياع
كان قصدك << سر حبك >> .. أوعدك لأصبح بخيل
وأحمل أسرارك معي للموت قدر المستطاع
بس قولها .. قول : ماأحبك .. وأبشر بصبرٍ جميل
لاتحسب إني مثل من طبعهم لوي الذراع
صاحبك ماهو كذا ياصاحب القد النحيل
صاحبك طبعه غريب وغربته غربة طباع
في الهوى مايقبل الحل الوسط ولا القليل
مثل ماهو لاشرى يشري .. ليا من باع باع
ثابت لو هي تميل الأرض حدره .. مايميل
يدري إن الفقر ماهو عيب والدنيا متاع
ماعشق لذة حياته كثر عشق المستحيل
ولا كره حتى مماته كثر كره الإنصياع
كم تعلم من شديد البدو وش معنى الرحيل
وكم تعلم من غروب الشمس وش معنى الوداع
وكم تعلم من سحاب الصيف وش معنى الحصيل
وكم تعلم من ليال البرد وش معنى الضياع
إيه .. أنا هذا طريقي (( موحش ,, وصعب ,, وطويل ))
وإنت لامنــــك تعبــت .. العالم فجوجه وســاع
إعتبرني في بداية سكتـــك عــابــر سبيــل
روح .. وأنا قلبي معك من وين ماوجهت الشراع
يكفي إني لاإنذكرت في (( سالفة عشاق )) قيـــل :
عاشر أحبابه شجـــاع ... وفارق أحبابه شجـــاع
===================================
اعجبتني فأحببت ان تقرأوها
أحـــــــــ م ــــــــد
الأربعاء 10 سبتمبر - 1:10 من طرف 
موضوع: من بغى الفرقا 
